ديوان هايل الاشجعي

[المدير]

للقراءة فقط

لعدم مقدرة الشاعر الدخول للانترنت وكتابة قصائده بنفسه


سيقوم احد ابناء قبيلته بوضع قصائده هنا

[حمود الاشجعي]

قصيدة الشاعر هايل علي البدري الاشجعي

ومناسبة هذه القصيدة كان الشاعر هايل يتجول في شعيب القبر وراى قبر الامير دحام المعجل رحمة الله عليه ومنازل الاشاجعه .. وهاضت قريحة الشاعر وكتب هذه الابيات

يادار وش اللي حصلبك من قرون
** يوم الشلافي والسيوف المحناه
يوم السلف قبل المظاهير يمشون
** فوق المهار وفوق ههجن ( ن) مزهاه
بدوٍ طلوع الشمس دنوُ يشيلون
** على البكار وفوق زملن معفاه
يتلون براق لنوه يخيلون
** ومشو على صوب المخيله ومشحاه
قالو ثلاث ايام دونه تعشون
** ورابع نهار لارحلتو نزلناه
يوم وصلو لديار نوه يقولون
** العشب من فوق الرواسي وغطاه
به ام سالم تزعج الصوت بلحون
** والصبح تسمع للقطى حس ناناه
والفقع بين بيوتهم له يحوشون
** والصيد بيى قاع لارحت تلقاه
ربك عطاهم خير ماكان يرجون
** ولاخاب من يدعى الكريم وترجاه
يوم الرجال قلوبها مابها ظغون
** ونياتها على الفضايل مصفاه
من دون ضيف البيت والجار يثنون
*** لو تكبر القاله على شان بلواه
والضيف من ميسورهم له يحطون
** يوم الكرم مابه نفاق(ن) ومرجاه
وللغانمه بالروح والمال يشرون
** قروم الرجال اهل النواميس والجاه
وبشوارهم ماردو الشور لعفون
** عفن العرب ماتاخذ الناس برياه
لو كان عنده ثروةٍ مثل قارون
** حض الشيوخ اللي على الحول تداه
يوم اسمع اللي لسوالف يعدون
** اشتاق للماضي لونه معاناه
قصٍص فيها من الحكم كل مضمون
** لجيلن رحل قدامنا ما لحقناه
وقت مضى فيه المسرات وغبون
** وهذا الذي ربك على الناس جراه
جيت الشعيب اللي به الشيخ مدفون
** وسمي شعيبه على قبره مسماه
شيخ يصد المغيره ضحى الكون
** ومن عادته يوم القى ينطح اعداه
دحام هو دحام بالفعل مبخون
** وكم راس شيخ طاح من سيف يمناه
وقاسم ولد فارس به الناس يدرون
** شيخ عقب دحام والعز سواه
يوم الشلافي وارخم السيف مسنون
** خيل القلايع حطبه عبد يرعاه
وفرحان مامثله شيوخٍ يحلون
** ومن هيبته عصم الشوارب تدراه
وعقب شيوخ بالاوازم يسدون
** ماكر حرارٍ وللشجاعه مضراه
معجل لاركبو على الخيل يشفون
** ان صاح صياح الضحى وقام ينخاه
سربت هل الجدعا على الموت يردون
** ورد الضوامي يوم تقبل على ماه
وصابورهم عيال مشجع ضحى الكون
** كسابت الطولات يوم الملاقاه
عيال مشجع بلاقى مايهبون
** جمع ثقيل وخاسر من تحداه
ماني مفضلهم على الناس بالكون
** لاشك ربعي وافتخر بالمولااه
كل القبايل يوم طاعن ومطعون
** بالسيف كلن تدرك الحق يمناه

[حمود الاشجعي]

بسم الله الرحمن الرحيم

قصيده للشاعر / هايل علي الاشجعي


الله من همآ بقلبي له شهور ** همآ معاليق الضماير شتلها
يصلى على قلبي تقل نار بابور ** وجمع هواجيس شتات ودبلها
وقضى على احلامآ بها كنت مسرور** احلام هاجوس الضماير فتلها
وسجلت انا مالاق للقاف بسطور ** اخذ جزيل القاف واترك سملها
مثايلأ من خاطري جبتها حضور ** تشبه شهاليل المطر من هللها
دنياك هذي كل عصرآ لها دور ** ومن عاش بدنيا يجرب عللها
يما هفابه من رجاجيل وقصور ** ناسآ رحيل و ناسآ تنزل بدلها
نطيحها مثل الذي نادس الطور ** اقرب مثالأ يوم قلت لمثلها
وترى الحضيض الي مع الناس مستور ** رجلآ يصلي والعطايا بذلها
مايعرف النمه ولايشهد الزور ** وفي قولآ والامانه حملها
وياما حلى بيت الشعر برضآ قفور * * خير عندي من مساكن فللها
بيت كبير ويدهله كل مصطور ** وارزاقنا رب الخلايق كفلها
في وادين توه من المزن ممطور ** وريح الفياظ معطره من نفلها
بوقت الربيع وعشبها كله ا زهور ** ومتشابكن عشب الوعر مع سهلها
مع لابتن مبطي بها الطيب مذكور * * ربعآ تنومس ظايف يادهلها
اشاجعه لياصار يومآ به شرور ** مقرود حضآ من يطيح بوشلها
مقدامه شيخآ بالأفعال مخبور ** وكم ديرتن يوم المخاطر نزلها
الشيخ ابن معجل بالأمجاد مذكور ** وكم قالتً بذباب سيفه بتلها
عوق العديم اللي به الزوم وغرور ** اللي اشنابه للمراجل فتلها

[حمود الاشجعي]

ياراكب اللي وارده فوق تسعين
** يقطع رهاريه اسهال الهوايل

جمسن حمر يسبق رفيف الشياهين
** ولامشى منصاه بيض نثايل

ياعيال اللي بالسفر فيه ناوين
** خوذو سلام (ن) كاتبه بارسايل

سلام (ن) احلى من نبات الرياحين
** واحلى من در معبسات الشمايل

اخص به ربعي عيال الشباعين
** اعداد ماخط القلم بالسجايل

من ساس قوم بالملاقا ضريين
** جعافره من صفوت عيال وايل

يوم انقى مردود بين القبلين
** بسوفهم يامرملو من حلايل

اجدودهم في نجد مثل السلاطين
** بالسيف الاملح كاسبين النثايل

ياعزير بن وقيت زبن المخلين
** عوق العديم اللي عن الحق عايل

طيبك ترى معروف يوم الدهر شين
** مثل البليهي ترتكي للثقايل

ورحيل ابن وقيت ماله مشادين
** مثل القطامي مايصيد الهزايل

به الكرو والمرجله زايد الدين
** وهداج تيما مايشاد المثايل

والقرم نايف شوق عذب المزايين
** اللي مدحنا في جزيل المثايل

قيفان شعره لون زهر البساتين
** من ريهجان القيل ماهي حثايل

ومن يذكر المعروف ياراح بالزين
** هذاك مثله بالنشاما قلايل

عز الله ان الطيب عند الوفيين
** مبينين بوجيهم له دلايل

ياليتكم معنا بقيتو امقيمين
** ياما عن الدنيا نشد الرحايل

حيث انكم عند الجماعه حشيمين
** من طيبكم يامعذبين السلايل

منتم تراكم يالنشاما غريبيين
** منا تراكم مابها قول قايل

ومقل دل وزبدة الهرج تثمين
** وقولن بلا معنا ه ماله دلايل

وصلوا على اللي بالهدى وضح الدين
** نبينا المختار راع الفضايل



هايل علي الاشجعي

[حمود الاشجعي]

الشـيـخ محـمد ولـد فـرحان = يـســوا كــثـرا مــن جــيالـه
راعـى الجـدعا رفيع الشـن =الـعــز مــن هـيبـتـه جــالــه
لـلـمـبتـلـى دايــما مــزبــان = وكـم قـاصـرعـاش بـظلالـه
خفيف نـفس وكثير احـسان = ولـجـل الـكـرم مـاذخر ماله
وإبـيـته مـاسـكـر الــبيـبـان = ودوم الـرجـاجـيل مـدهـالـه
والضيف يقلط على خرفان = بــصيـنـتــه نـابــيــن جـالـه
وتلـقى أشقـر الـبن برسلان = يــداوى الـــراس فــنجــالـه
كــل يـوم بيـته لــنا ديــوان = وبـجمـعـنا يــنشــرح بــالـه
قـبـلـه جـدوده لـنا شـيخــان = شـيــوخ جـد عــن ســلالـه
يوم العرب صاحب وقومان = والنـاس تـرحــل ونــزالـه
معجل نهـار الـوغـا شجعان = شـيـوخ وفــرسـه وخـيالـه
شـى معـروف مـع التعربان = وكلـن يوصف على أفعاله




هايل بن على البدرى الاشجعى.

[حمود الاشجعي]

بسم الله الرحمن الرحيم


السلام عليكم ورحمة الله وبركاته

هذ قصيده للشاعر هايل علي الاشجعي يمدح فيها قبائل الجلاس



مديت انا الدربيل في يوم الاثنين
= بالمرتفع لأرض باداَ سرابها

وغيرا لتلول السود ما شفت انا شين
= محميتاً ببيت الشعر ما قربها

دار الخلا ياناس ياشينها شين
= من قلت السكان ربي ذربها

يادار وين اللي سكن بك من سنيين
= هل الجهام وخيليها مع جنبها

ببيوتهم للكيف تلقى دياوين
= ونجراً يصوت للمسير ندبها

مايكرهون للضيف لوهم مقلين
= طبيعتاً رب الخلايق وهبها

وان صاح صياح الضحى والخبر شين
= قال المعادي غار والبل نهبها

البل خذوها من على الخيل غازين
= وقفت كما سحب(ن) تقطع هدبها

والحقو هل البل من صطرهم مغلين
= فوق المهار اللي سريع طلبها

وتناطحو يوم شافت العين للعين
= في ساعتن نار المشوك لهبها

كلٍ يابي من صاحبه يوفي الدين
= وكلٍ يريد الطايله ون كسبها

عقيلهم بالهوش مثل المجانين
= صعول الرجال اللي تخلص منشبها

ون قيل منهم قلت ربعاً مسمين
= عيال الجلاس اللي رفيعاً نسبها

بعصورهم سادو سوات السلاطين
= وديارهم بالسيف محد(ن) قربها

عيال زايد من قديماً عزيزين
= وفعالهم محد(ن) بقيله حسبها

واليوم كنا لعلمهم ماحصل شين
= دنياك هذي عجبتاً من عجبها

[حمود الاشجعي]

ياما حلا لياهب ذار النسانيس ==== ذعذاع غربن سالمن من عجاجه
برضاً حماها ماوتته العواسيس ===== وديان براً ماسكنها الخواجه
عشبه جديد وتو برجل ماديس ==== والماء غديراً والبختري سياجه
ماغير صوت طيورها له نقاريس == ورف القطا تسمع لصوته لجاجه
وقت الغروب وزان وقت المجاليس == ونزلت في روضاً خضاره دماجه
ورح عليه الذود وضح ومجانيس === وفكيت حمل اللي عليه الحداجه
والبيت بننه بنات (ن) نواعيس ==== ودقن وتاد البيت برضاً كراجه
وشبيت نارا تطرد الهم وابليس ==== ومعي لزوم الكيف من كل حاجه
وسويت فنجال (ن) يزيح الهواجيس == من ماء غدير صافياً كزجاجه
يبري هموما بالضماير مراميس ==== طب الهموم اللي صعيباً اعلاجه
هذا هوا بال(ن) حدته الحواسيس === وارث البدواه صار براس تاجه
مار المناوي ماتفيد المفاليس ====== والوقت شان وصار فيه انعواجه
وراحة علوم اللي على الخيل فريس == وعصر البداوه حاجبيينن اسراجه
واليوم دور مكرس المال تكريس ==== الشيخ راعي المال لو هو دجاجه



هايل علي الاشجعي

[حمود الاشجعي]

اهل الحسد والنميمه



ارقبت بالمرقاب والرجل كلت
===== === من كثر نطي للمراقيب كليت

لياشفت انا راس الطويله تعلت
====== === لمرقابها لو هي بعيدن تعنيت

اقول بلك النفس فيها تسلت
====== من هاجس في خاطري يمها جيت

لا شك ادموعي من نظيري انهلت
======== وصفقت بالكف الشمالي وونيت

ذكرت ارجالن يافتى الجود ولت
======= واعظامها صارت ترابن هتاهيت

اللي على دروب المراجل تعلت
===== بالسيف الاملح كاسبين هكا الصيت

ياما على قطعان وضحن تدلت
========= فوق المهار مكاظمين العناتيت

ماعمرها عن اللوازم تخلت
======== هل البيوت اللي تعزت ليا جيت

ياليتها عن باقي الجيل ظلت
========= وبدالها ولت اكلابن سرابيت

اهل الحسد واهل النميمه تملت
======== بسوالفن مثل الحجاوي هرابيت

والنفس عن بعض المجالس تعلت
====== وقصرت رجلي عن بعضها وصديت

حيث الحقيقه يوم ليه تجلت
======== ماخاب هجسي يوم بالربع ظنيت




هايل علي الاشجعي

[حمود الاشجعي]

ضيف المها



انا غريب وجيت لدياركم ضيف
========= ضفتك وانا ماريد مانن ولازاد

اريد انا غر الثمان المراهيف
========= وامببيسمن كن العسل منه ينقاد

هاذي شفاتي كان جتلي على الكيف
========= اخذ قضايه منك ياغض الانهاد

يالترف يازين الحلا والتواصيف
======== ارحم محبن من ومودتك منصاد

جرحتني بسهوم نجلن تقل سيف
====== وجرح الهوى طب العرب فيه مافاد

مريض وانتي من اسباب الصواديف
======= ان كنت عني يااريش العين نشاد

تسوقني يمك هبوب العواصيف
=========== هبوب مزنن ياتقفاه رعاد

واجري كما تجري ذيابن مهاريف
======= وراك ياخشف المها ظبي الانفاد

ياعين حرن مرقبه بالمشاريف
========== كفا التغلي منك والصد وعناد

اما كسبنا الفود وإلا منا كيف
======== ودرب المذلة صعب يابنت ينعاد




هايل علي الاشجعي

[حمود الاشجعي]

الهقوه والظنون


الله من هم (ن) على القـلـــب زادي ... هم (ن) جرحني داخل الصدر مكنون

من سبته صـــارت حيـاتي ســوادي ... وضاقت بي الدنيا على واسع الكون

منكوب انا نكب الزعيـــم الكــرادي ... اللي بجزيره مرمره حط مسجــــون

عليه جيش الترك مثل الجــــــرادي ... مطــوقين ســـور ســـجــــنه مليــون

عقب المعــزه بالسناســــل يقـــادي ... طلاب حـــــق وصار بالعكس مديون

وصبري على بلواي مثل المهـادي ... اللي تحمـــل خــونة الجـــــار تدرون

عدا عليه يافتـــى الجــود عــادي ... ذيب الرجال اللي يقـــولــون ملعـــــون

وبيدي والــــرجلين حــط القيادي ... وامسيت من همـــه ذليلن بي اغبــــون

ورميت عن كور المطيه شدادي ... وعقب الخطا قصرت رجلي على الهون

هبيت يادور المحــــن والنكادي ... وقتن يصلفقـنــا تقــل راي مـــجـنـــــون

فيه الحياة ملولســـه بنعقـــادي ... حياة هـــــــم وغـــم وحســــوف وديون

وعجزت احقق غايتي والمرادي ... وصــار الامـــل مابين هقــوات وظنون

مثل الذي يطرد سراب الحمادي ... ولاظــنــي المضمين بــه حصـــلوا لون



الشاعر هايل علي الاشجعي


ملاحظة:
التعديل فقط من اجل تنسيق القصيدة.

[حمود الاشجعي]

بسم الله الرحمن الرحيم


السلام عليكم ورحمة الله وبركاته


قصيدة الشاعر هايل علي الاشجعي بمناسبة الحفل الذي اقامته قبيلة الاشاجعه تكريما للشاعر
شاهر الفقيري بعد رجوعه من مسابقة شاعر القلطه



يامرحبا ترحيبت (ن) تشرح البال
====== بقدوم ذربين الرجال المشاكيل

مية هلا نعيدها قدر وجلال
==== ترحيبت (ن) تشبه قراح الشهاليل

بخورها هيل الفناجيل بدلال
===== وصيانين من فوقها سمًن الحيل

تقدير للي حاز بالشعر منزال
====== منزال بدر(ن) لاتعلى على سهيل

حراً يصيد الجزيله لياجال
===== وقليل من ياصل لمثله مواصيل

لانزل بالملعبه صار زلزال
===== ويحرج خصومه لاعقد بالتماثيل

هو شاعر القلطه على كل موال
====== وشاعر بني وايل بكل المحافيل

اخص فيها شاهر طيب الفال
========= اللي بفعله طال علم التنافيل

من ساس قوم (ن) بالمراجل لها افعال
==== يوم السيوف ويوم فزعة هل الخيل

ياما اعتلو بافعالهم طايلٍ طال
===== وعدوهم سقوه سم(ن) من الويل

قبيلةٍ يذري حجاها ولها ضلال
====== وجمع الفقيري لنحدر كنه السيل

مقدامهم شيخ (ن) شجاع من الابطال
======= ابن الفقير اللي افعاله تهاويل

راعي البويضا ياخذ القوم لاصال
======= من دور دبشي بالملاقى قواتيل

نعم (ن) بهم والحق لابد ينقال
===== وعندي على مدح النشاما دواليل

قلته وانا من لابتن ترخص المال
===== ريف الطراقي بالسنين المماحيل

بيوتهم للضيف والجار مدهال
===== وحلو(ن) نباهم للضيوف الهواشيل

اشاجعه ربعي مقاديم الابطال
====== زبن الدخيل لاحدته الغرابيل

لوقفو بالكون لمعرب الخال
==== صاح (ن) عليه ناقضات المجاديل

وقول(ن) بلا معناه للعيب مدخال
======= متعرض للي يقص الشماليل

وصلاة ربي عد ماهل همال
=== من مزنت (ن) اظلم سماها كما اليل

على الذي صلى الفريضه والانفال
====== شفيعنا في ماقفا حرج ومهيل



وهذه الابيات التي كتبت على الدرع الذي استلمه الشاعر شاهر من الشاعر هايل


انت شاهر وشتهرت بكل ديره
==== شاعر القلطات وبفعالك شهدنا

لك مواقف بالشعر تبقى شهيره
=== تنومس الويلان وضد اللي حسدنا

سيوف وايل بالقى دايم شطيره
==== وانت سيف عيال وايل ياسندنا

[حمود الاشجعي]

ابي اتكلم عن قضية فلسطين
======= اللي لها ستين عام مغصوبه

شعب (ن) يقاوم بالحجر والسكاكين
======= وعليه نيران اليهودي شبوبه

عليه نيران القنابل براكين
======= وجميع نوع سلاح به جربوبه

والقدس بسواره تحفر الشياطين
======== ومعالم التاريخ به خربوبه

رهينتن عند اليهود الملاعين
== وعن العرب مسرى الرسول محجوبه

وجاء السلام اللي به العُرب راضين
====== واثري سلام الغرب كله اكذوبه

كذبت عصر ومصدقه من ملايين
====== والكارثه بعض العرب صدقوبه

سلامهم قتل وحصار المساكين
========= جريمتن ماتنغفر من ذنوبه

وين العرب وين الحرار الميامين
====== وين الجيوش وين دور العروبه

توحدو بصفوفكم لنصرة الدين
====== مثل الذي كل الصحابه مشوبه


هايل علي الاشجعي

[حمود الاشجعي]

الشاعر هايل علي الاشجعي

بمناسبه تجديد البيعه من قبيلة الاشاجعه لخادم الحرمين الشرفين الملك عبدالله بن عبدالعزيز ال سعود


اول مابــدي كلامــي ياالاسلامي نشكر ربي الأنامي ................ ربي سبحان

وابدي قافاً نقيته من بديتـــه علـــى ســاسه بــــنيته ................ عن النقصان

قــافــاً زان بترتيبه ونغـــنيبه ممــــلكتنا الحــــبيـــبه ................ قلت القيفان

يا الله ترفع رايتنا لمن عـــادتنا لــلي بســـون بغتنا ................ لها الحرمان

حنا بظل الأسعودي أهل الجودي بعز وامن نسودي ................ بأمن وأمان

مشو بهدى القران والله عاني هـــم ابطال الزماني ........... صدق(ن) شجعان

عبدالعزيز ارســــاها وتولاها وكـــل الفتنه محاها ................. بين العدوان

بالشريعـــه حكمـــها ماظلمها يــاما رفرف علمها ................ دوله وأوطان

وجت ملوك(ن) شهيره بالجزيره ورفعوا بالمسيره .................. علم وبنيان

وبالحـــضاره مشينا وارتقينا وبالســـواعــــد بنينا .... .......... شي(ن) ماكان

ولبو متعب جددنا له عهدنا ملـــــكنا هو ســـندنـــا ................. رفيع الشان

من الجنوب لشماله حنا عياله وبالحرايب رجاله .................. جند الرحمن

ولبو خـــالـــد قسمنا والتزمنا تحت راية عــــلمنا ................ نصد العدوان

من دونك ياوطنا ناقف حنـــا والخاين ماهو مـــنا ............... ردي الشان

[حمود الاشجعي]

هذه القصيده اهداء الى الشاعر / سلطان محمد الفرحان المعجل





يابن معـــــجل ياسندنا بالازوم == شيخنا مقدامنا فـــــي كل هــــــيه

يانخانا بالاوازم لــــــــــه نقوم == ولانحسب بالــــمواقف للمنــــــيه

ابو فيصل ياعسى عـــمره يدوم == شيخنا راع المروه والـــــــحميه

لـــه مضيف والنشـــاما فيه دوم == ودوم ناره حيـــــت(ن) للشاذليه

مجلسه من جــاه مــــــاوده يقوم == حيث فيه من المـــهابه قابــــليه

وعوق منهو بصطاره فيه زوم == لاتغطرس من براسه عنـــــجهيه

وانت ياسلطان من ساس القروم == من شيوخ(ن) بالمراجل شوشليه

والدك حاش المـــراجل والعلوم == علوم فيها نفتخر يالــــوايــــــليه

وانت نجله وعارف كل السلوم == هوابوك وبالوصايف جيت زيــه

شبه حر(ن) مرقبه عال الرجوم == وياضرب في مخلبه عشا خويه


الشاعر / هايل علي الاشجعي

[حمود الاشجعي]

نثور الوبل




الــــبدو لو شان الدهــــر دوم صبـــــار == رجالهًم من قلت المـــــال ماخــــــــاف

تلــــقى ملافيــــهم بها الــبن وبهـــــــار == وذباحت(ن)للحيل للــــضيف ياضـــاف

ببيـــوتهم تلقى المــــــعزه ومقـــــــدار == لضيفهم حلوين وانفــــوســــها خفـــــاف

هم الـــذي باقـــــين ترثة هل الكــــار == وإلا الحضاره وضـــعها اليوم ينعـــــاف

عسى عليــــهم دايم الوبـــــــل نثـــــار == وترجع اسنين الخــير لهم بالاريـــــــاف

وتشوف ورود العشب من كل الازهار = يرعون عشب(ن)من الشتا حتى الاصياف

وتخسر جميع اللي على البدو تجــــــار == اللي مهنتهم بس بيــعن للاعـــــــــلاف

ربك قدير يبدل العـــــسر لايســـــــــار == ويفقر زناقيلن تبـــجح بالاســــــــــراف

هــــــذي طــــــبوع اللـــــيلي والادوار == وينبيك عن ماضي زمانك من اســلاف

وين الذي ركبوا على قــــب الامهـــــار == وسلاحهم سيفن مع الرمح وشـــــلاف

ماتقل غاروا فوقهن والدخـــــــن ثـــــار == وحس البنادق بينهم يرجف ارجـــاف

حماية التــــــالين بالموقــــــف الحـــــار == في ساعة فيها احمر الدم ينشـــــــتاف

اليوم ما بالقهم غــــــيـــــــر الاذكــــــار == اقفت هل الشومات وعصورها طاف

واليوم وضع الناس بالحــــيل منهـــــــار == محد(ن) يقول الحقيقه والانصــــاف

من زاد ماله صار شيخ(ن) ومختـــــــار == يزمر عد انه من مواريث نــــــواف

لو هو خبيث وطبعه انجس من الفــــــار == يصير بعيون الملا زين الاوصـــتاف

وتلقى انذال برفقته ويــــــن ماســــــــار == اهل النفاقه اللي لها اطماع واهــداف

واوصيك عن اهل الردى تبعــــد الـــدار == لوكان تسكن وادين نوب ينحـــــــاف

وخلك عزيز النفس صـــــــلبن وجبـــار == مادام راسك تحمله فوق الاكتــــــاف

[حمود الاشجعي]

مناسبة هذه القصيده انه احد اصدقاء الشاعر سئله عن سبب انقطاعه عن بعض المجالس

فرد الشاعر عليه قائلٍ



عايش با لمملكه وسط بلدي == وكل طيب لياء عرفته لي صــديــق

والردي مابيه لو كان ولدي == والله ان امجـــلسه صدري يــضــيق

حيث عند الازمه ماهو سندي == والتجــــارب عــلمتنا بالــرفــيــق

الردي ياصاحبي يبقى ردي == شــقــلبــاني كــل يــوم لــه رفــيــق

ليا بغاله حاجت(ن)جاك يعدي == وليا تنكر صد لوكنت بحــريـــق

لجل بعده جبت حيلي وجهدي == وعن طريقه سالك(ن)ثاني طريق

الله اللي ساعة الضيق نجدي == الله اللي مـــن دعـــا لـــه مايضيق

ولايسقيني ليا عطشت إلا يدي == دام جسمي سالم(ن) وانــا طليق


الشاعر / هايل علي الاشجعي

[حمود الاشجعي]

الاوجاع



وقلبي اللي زاع مابين الاضلاع == وشلع كما طير(ن) سبوقه تلنه

من شاف ملهوف الحشا يمها زاع == بيدي سبوقه مار ما جودنـــه

من شفتها معروف عقلي تقل ضاع == ابو عيون من نظر يخلفـــنه

عيون حر(ن) يعطب الجول ياجاع == ياقرد حظ مغربل(ن) يجرحنه

ابو جديل(ن) فوق الانهاد شـــراع == مثل الذهب لون الذهب يشبهنه

فيك الحلا مجموع من كل الانواع == الزين فيك مجمع(ن)وانت فنه

من سبتك ياناعس الطرف ملـتاع == وغيرك فلا حي عيوني بغـــــنه

من اجلكم يا ما طوينا من القــــاع == واقدام رجلي كل خط(ن)وطـــنه

وامشي لكم من غير راياً به اسناع == وبعض المواقف محرجه واسفهنه

ماترحم اللي ساقه الود دفــــــــاع == عليك صعبات المواقف حـــــــدنه

واليوم جيتك شاكياً مر الاوجـــاع == ونيران شوقك بالضمير احرقـنـــه

لاوخساره كان فيك التعب ضـــاع == وايدي مطلوب المنا ما لحقنــــــه

لولا الحيا لاصيح وانخى بالافزاع == واخذ قضايا منك من دون منـــــه



الشاعر / هايل علي الاشجعي

[حمود الاشجعي]

وردة البستان



الله مــن عيــن (ن) تــزايد شــقاهــا == دايــــــم تهل الدمـــع يانامــــوا النـــاس

والــفكر حـــار ودار ســـبت بلاهــا == تقل لــــهـــــا عن لذت الـــنوم حـــراس

ماهو شهـر واسبوع طـول ابكــاهــا == ولجت ضلوعي وصار بالقلب وسواس

يالله ياالــلي عــالم(ن)وش شـفــاهــا == تــفرج لـــلـــي يرجيك والخلق نعــــاس

تجمع بشملي مــع حبيب(ن)مــناهــا == ماقدر اجيها ودونها وجيه الانحـــــــاس

كــم لــيلةٍ مانــام ســبــت غــلاهـــا == عدي غريب الدار مــــاحولي او نــــاس

وقبلي عقاب(ن) حب نوت شــكـــاهـــا == وشرب مرار الحب من نوت بالكـــــاس

وبنت الزنادي يوم مرعي بغـــاهــا == تحاربوا واسبابها جـــادل ا لــــــــــراس

والقــلب عيا عشـــقــته مانســاهـــا == وصرنا على ماقيل بين الرجــا ويــــاس

لو درت شرق وغرب ملقى سواها == زهت بعيني وكل عين(ن) لها قيـــــاس

ماشفت انا بل بيض ملحة حــــلاها == عين العنود وصفها ريم الاطعـــــــــاس

والعمر خمس وعشر باول وغواها == ونهده كما التفاح بالصـــدر جــــــــلاس

هي وردة البستان ماحد(ن) وطاها == مزروعتن بالفي مع جـــانب الســــــاس



الشاعر / هايل علي الاشجعي

[حمود الاشجعي]

الذات


طبعي وفا وارد معروف الاصحـــاب == ولانسى جمالت من تجمل بذاتي

من مدلي يمنى الوفا كلها اطــــيــــاب == اصير له مثل العسل من حلاتي

واقدر الطيب لونه مــــن اجنــــــــاب == واضفي عليه من الحشيمه عباتي

له منزل(ن) عندي على راس مرقاب == ولاطاله اللي دار فيه الشمـــــاتي

وإلا الردي مابيه لوهو من اقــــراب == خله يولي ماعليه احسفـــــــــاتي

ماهو فقيده يوم عن النظر غـــــــــاب == عده مع اللي بالمقابر امـــــــواتي

الحنضله ماقيل تثمر بالاعنـــــــــاب == مر(ن) طعمها عند جميع انــباتي

وافطن ترى عرق الرديين لســـــاب == فصيلتن بالـــــدم واجيــــــــناتي

الساس ساس(ن) ماعن الساس مجناب == ولاغيره كثر الحلى والغنـــــاتي

والمرجله ماخاضها واحد(ن) هـــاب == اخطارها تيبس عليك الهـــــاتي

تبي شجاع يشبه عقاب وحـــجـــــاب == صميدع(ن) بالكون قلبه حصاتي

واليوم من ماشافت العين مرتــــــاب == والقلب لاحساس الجوارح مراتي

شفت العداوه والحسد بين الاقــــراب == وقلوبهم بالود متــــخالفــــــــاتي

بعض الاوادم لوتبسم بالانيــــــــــاب == سواد قلبه لون كحل الــــبنـــــاتي

لاتامنه لو تامن الجن والـــــــــداب == وخلك عن اشباه الردي بالعلاتي


الشاعر / هايل علي الاشجعي

[عزوتي هلي]

السلام عليكم
أخي حمود لقد سعدت بوجود القصائد الرائعه للشاعر هايل علي الاشجعي
ليت الوالد مازال حيا لكنت أسعد الخلق وانا أقرأ له قصائد ربعه
رحمه الله رحمة واسعه واسكنه فسيح جناته وغفر له ولموتى المسلمين