هذه قصيدة الأمير محمد الأحمد السديري في رثاء الشيخ: ورنس بن طراد الشعلان

[ابو قنوا]

--------------------------------------------------------------------------------

يسقيك يادار شمالي عنازه
غرب الولج ياعلي شرقي طريبيل
سقاك نو ممطر من عيازه
على رغاب القاع فيض من السيل
عز الله انه راح فيها جنازه
صميدع توصف عليه الرجاجيل
له في عازات ولي فيه عازه
بوقت اللزوم ليا حصل باالدهر ميل
ماالوم قلبي لو يزيد اهتزازه
وجر الونين وشاف ظيم وغرابيل
وعيني كما شن تفتق خرازه
عليه دمعات المحاجر هماليل
حر جزع وادما بقلبه حزازه
وتفجرت شعبان قلبه مباهيل
قلبه من الفولاذ ماهو قزازه
والغيض قد فجر قلوب مغاليل
وان داخل الشردان رعب ونزازه
الذل مايلقا عليه المداخيل
تقصر يمين اللي بالايام هازه
يرجع ذليل وفاقد العقل بهليل
ليا لمح ضده ثقيل مرازه
اخو محمد صافي الذهن حلحيل
من شبته ياما قطع من مفازه
وياما ظهر من غرقة كنها الليل
رقى سنام المجد والطيب حازه
وبيته لعصمان الشوارب مداهيل
هزيم حطوا حفرته باالعزازه
براس الطويله وارفع القبر باالحيل
ومن الذهب حطوا لقبره ركازه
ومن صافي النيروز حطوا قناديل
حتى يجيه اللي بعيد منازه
ويلقا بقربه شمخ القود والحيل
اعتضت به ربع لقلبي لهازه
اعني هل العليا قروم مشاكيل
علمي ليا جاهم سريع نجازه
وانا لهم دايم على العدل والميل
هم فزعة المضيوم وهم جهازه
وباالفعل للشعلان تشهد هل الخيل
شعلان فيهم باالحرايب فيازه
بجدع المدرع فوق قب مشاويل
ربع حماهم مايقرب حجازه
وعدوهم اسقوه ويل بثر ويل
ان حل ضرب مخلص بالبرازه
ارووا حدود سيوف حدب مناحيل
احد يحوش الطيب غصب خزازه
وناس عن العليا ضعاف مهازيل
يبين لك فرق الذهب من بيازه
فرق بعيد ابعد من الجدي لسهيل
البيض ترضع لين تيبس غرازه
وبالالف يطلع واحد به تنافيل
تاخذ رفيعين المباني بزازه
ياليتها تعتاض عنهم تباديل
ان قيل قلبك مصخر بانحيازه
قلت الوفا له وسط قلبي مثاقيل
وانا احمد الله ماحضرني خرازه
وردون ثوبي ضافيات ومضاليل
يسقيك يادار شمالي عنازه
مزن من المنشا ركونه مخاييل